Jazbaa

Naheen gore gareebaan Taj ye meri muhabbat ka

jabeensaai ki bas tehzeeb hi hum ko gavaara hai,,

hai bas izmaal kul itna , muhabbat ho gayee tum se,

koi kadgham naheen Tanha ka dil ab se tumhaara hai,,

Kayee the baam jin ko paar kar humko guzarna tha,

kayee manzil rahee hain taakti hum ko kinaare se,,

hain kitnee hi safar jo ho gaye bas naatamaam yoon hi,

magar raahain hui paamal ye kisko gawaara hai,,

Muqaddar baaz kyoon aaye, masarrat ho bhala kyoon kar,

meri duniyaan main mushte khaak ki bhi ab jagah kyoon ho,,

huee jaati hai bande gham se doobhar zeest yoon jaano,

main ab bhi saans leta hoon asar ye bas tumhaara hai,,

Safar hai tab muqammal, raaste main khaar bikhre hon,

lahoo se seenchta jaaye musaafir apni raahon ko,,

mujhe majdhaar main jaane ka koi shauq ab kyoon ho,

na hain toofaan ke aasar aur zad main kinaara hai,,

- - - - - - - - - - - - - - - - - - - - - - - - - - - - - - - - 'TANHA'

shrdhanjali

Ekla Cholo Re

-------------------

teri aawaaz sun kar ansuna beshaq kare duniya

tujhe har haal main aage hi bas barhna sada tanha,

- - - - - - - - - - - - tujhe chalna hai bas tanha

teri baaton ka sach unki samajh main gar naheen aata

tera jeevat naheen sansaar ke vyvhaar ko bhaata,

samajh le sach ke sang kaayar khara hota nahin koi

abhage sach ki  khaatir  to tujhe larna hai bas tanha,

- -- - - - - - - - - - - tujhe chalna hai bas tanha

kabhi beehar se guzrengi teri raahain samajh le tu

kabhi chil jaayenge pag shool bikhre paayega har su,

lahoo se apni raahon ko jo seenche, paayega manzil

lahoo se bheegi raahon par tujhe barhna hai bas tanha,

- -- - - - - - - - - - - tujhe chalna hai bas tanha

bhale roshan tumhaari raah karne aaye na koi

garajti raat toofaani tumhein sun paaye na koi,

abhaage dil jale, roshan tere gham se hi lao hogi

tujhe is lao ke hi sang umr bhar jalna hai bas tanha,

- - - - - - - - - - - - tujhe chalna hai bas tanha

- - - - - - - - - - - - tujhe chalna hai bas ‘Tanha’

mein bas chala hua hoon manzilon se beparvaah

hoon mein safar main kyoon iska pata nahin chalta

raha safar main hi khush manzilein udaas milin

kabhi kisi ko muqammal jahaan nahin milta

Kabhi kisi ko muqammal jahaan nahin mita

-------------------------------------------------‘TANHA’